Poivron, puwavuro cg Pepper, ni ubwoko bw'imboga bamwe bakoresha nkikirungo, nisoko ya vitamini C yo murwego rwo hejuru, ndetse ikagira nibyo bita ‘antioxydants’, nk’izitwa ‘caroténoïdes’. Kurya puwavuro kenshi bituma umuntu atarwara za kanseri zimwe na zimwe nka kanseri y’ibere, iy’urura runini ndetse n’ibibyimba ku bwonko.
Kubera izo ‘antioxidants’ bituma irinda umubiri gufatwa n’indwara zitandukanye.
Ituma amagufwa, amenyo, ishinya bimera neza.
Poivron niyo iza ku mwanya w’imbere mu byo kurya byongera abasirikare b’umubiri bikanabongerera imbaraga.
Bitewe nuko itarimo calories nyinshi, kurya poivron nyinshi ntacyo byagutwara ahubwo bituma umubiri winjiza vitamin A na C ku bwinshi. Kuba ikize kuri vitamin C bituma kurya poivron kenshi bifasha umubiri mu guhangana n’indwara iyo ariyo yose.
Poivron kuzirya birinda indwara.
Poivron irimo beta-carotenes izi zizwiho kurinda umubiri kubyimbirwa bikanawufasha gusohora imyanda.
Kuriya wumva iyo ari mbisi yokera nk’urusenda biterwa na capsicine ibamo. Iyi capsicine irwanya umubyibuho udasanzwe kuko irinda umubiri mu gukora uturemangingo turimo ibinure.
Poivron ni isoko nyayo ya vitamin E. Iyi izwiho gukesha uruhu no gufasha imisatsi gukura neza. Niyo mpamvu hari amavuta yo kwisiga usanga arimo iyi vitamini.
Puwavuro kandi ni isoko ya vitamine B6 na ‘acide folique’. Ubushakashatsi bwagaragaje ko puwavuro igabanya ibyago byo guturika imitsi yo mu mutwe ndetse ikagabanya ibyago byo kurwara indwara z’umutima.
Puwavuro igira uruhare rukomeye mu gusukura amara. Kuba Puwavuro ikize ku byitwa ‘fibres’ ndetse n’amazi bituma ibyo umuntu yariye binyura mu mara byoroshye bigasohoka.
Puwavuro ituma uruhu rugira ubuzima bwiza rugahora rusa neza kubera ibyitwa ‘carotène’ biboneka cyane cyane muri puwavuro itukura, bituma uruhu rusa neza. Ikindi kandi puwavuro irinda uruhu gusaza vuba.
Puwavuro ni isoko y’umwimerere y’ibyitwa ‘lutéoline’. Ubushakashatsi bwagaragaje ko indyo ikungahaye kuri ‘lutéoline’ irinda ubwonko kwangirika ndetse ikanarinda kwibagirwa bikabije bijyana n’imyaka.
Puwavuro ni nziza no ku bana batangiye kwiga kurya, gusa ngo kuri abo bana bagitangira kurya, ibyiza ni uko bahera kuri puwavuro y’umuhondo kuko niyo ibamo isukari, nyuma bagakurikizaho itukura bakazaheruka iy’icyatsi.
Irimo umuringa (cuivre/copper). Akamaro kawo mu mubiri ni ugukora no gusana uduceduce (tissues) tuwugize.
Irimo vitamin B6 (pyridoxine) iyi izwi mu gutunganya poroteyine twinjije mu mubiri no gukora hemoglobins. Ikindi izwiho kandi, ni ugutunganya isukari umubiri ucyeneye aho ihindura glycogen ikavamo glucose. Inafasha mu ikorwa ry’insoro zitukura(Globules rouges).
Harimo kandi thiamine ariyo vitamin B1.Iyi by’umwihariko izwiho kurwanya rubagimpande n’indwara zose z’imitsi n’imyakura.